भोलिदेखि नारायणगढ–मुग्लिन सडकखण्ड दिउँसो बन्द हुने

रातको समयमा सवारी आवागमन रोकेर काम अघि बढाइए तापनि नारायणगढ–मुग्लिन सडकखण्ड विस्तारको कामले अपेक्षाकृत प्रगति हासिल गर्न नसकेपछि भोलि (माघ १३ गते, शनिबार) देखि पुन: दिउँसो नै सवारी आवागमन रोकेर काम अघि बढ्ने भएको छ । भोलिदेखि एक महिनासम्म बिहान १० बजेदेखि दिउँसो ४ बजेसम्म सवारी आवागमन रोकेर काम गरिने चितवनका प्रमुख जिल्ला अधिकारी नारायणप्रसाद भट्टले बताए । रातको समयमा भन्दा दिउँसो काम गर्दा कामले गति लिने भन्दै स्थानीय प्रशासन, नारायणगढ–मुग्लिन सडक आयोजना, परामर्शदाता र ठेकेदार कम्पनीको संयुक्त बैठकले यस्तो निर्णय गरेको हो ।

यस सडकखण्ड विस्तारको कामलाई तीव्रता दिन भन्दै गत पुष १८ गतेदेखि राति १० बजेदेखि बिहान ४ बजेसम्म सवारी आवागमन रोकेर काम हुँदै आएको थियो । भोलिबाट दिउँसो नै काम हुने भएपछि आज राति भने सवारी आवागमनमा कुनै अवरोध नगरिने नारायणगढ–मुग्लिन सडक आयोजनाका इञ्जिनियर शिव खनालले बताए । गत वर्ष पनि दिउँसोको समयमा सवारी आवागमन रोकेर काम गरिएको थियो । तर, स्थानीय प्रशासनले रातको समयमा सवारी आवागमन रोकेर काम गर्न दबाब दिएको थियो । त्यतिबेलाको काम प्रभावकारी भएको भन्दै ठेकेदार कम्पनी, नारायणगढ–मुग्लिन सडक आयोजना र परामर्शदाता कम्पनीले स्थानीय प्रशासनलाई दिउँसो नै सवारी आवागमन रोकेर काम गर्नुपर्ने माग गर्दै आएका थिए ।

आयोजनाका प्रमुख चन्द्रनारायण यादवले रातको समयमा सवारी आवागमन रोक्दा राति र दिउँसो दुवै समयमा काम हुन नसकेको बताए । उनले भने, ‘रातमा सवारी रोक्दा दिउँसोको काम पनि प्रभावित भयो जसले गर्दा प्रगतिमा चार गुणाले कमी आयो ।’ सो सडकखण्डको घुमाउने, १६ किलो र चेपाङ डाँडामा भित्ता काट्ने काम बाँकी रहेको छ । घुमाउनेमा २०० मिटर, चेपाङ डाँडा र १६ किलोमा ३०० मिटर भित्तो काट्ने काम बाँकी रहेको छ ।

हालसम्म उक्त सडकखण्ड विस्तारको ७२ प्रतिशत काम सम्पन्न भएको छ । जसमा १४ दशमलव ७ किलोमिटर सडक कालोपत्रे भ इसकेको आयोजनाले जनाएको छ । जिल्ला ट्राफिक प्रहरी कार्यालय चितवनले दिउँसोको समयमा सवारी साधन पार्किङ् गर्ने ठाउँ तय गरेको छ । कार्यालयका प्रमुख सन्तोष पन्तका अनुसार नारायणगढबाट मुग्लिनतर्फ आउने ट्रकलाई भतेरी र रामनगरमा रोकिनेछ भने बस र साना सवारीलाई जुगेडी र दाशढुंगामा रोकिने छ । काठमाडौँबाट नारायणगढतर्फ जाने बस र साना सवारीलाई मुग्लिनमा र ट्रकलाई लेवाटारमा रोकिने छ । पोखरातर्फबाट आउने बस र साना सवारीलाई बेनिटार र ट्रकलाई आँबुखैरनीमा रोकिने उनले बताए ।

– रासस